ინოვაცია ტელეკომუნიკაციების სფეროს მამოძრავებელი ძალაა. ციფრული ეპოქის სწრაფი ტემპით განვითარების პარალელურად, მზარდი მოთხოვნების დასაკმაყოფილებლად ქსელების გაფართოების საჭიროება სულ უფრო აქტიურად დგება დღის წესრიგში. LPWAN ქსელის გაჩენამ კავშირისადმი მისი უნიკალური მიდგომის გამო განსაკუთრებული ყურადღება მთელი მსოფლიოს მასშტაბით მიიპყრო. ისეთი ტრადიციული ქსელებისგან განსხვავებით, როგორიცაა 2G, 3G, 4G და 5G, 0G უკაბელო კომუნიკაციის ახალ პარადიგმას ქმნის და განსაკუთრებული საზოგადოებრივი საჭიროების დასაკმაყოფილებლად ავითარებს უნიკალურ კონცეფციასა და მახასიათებლებს.
საზოგადოების გარკვეული ნაწილი მიიჩნევს, რომ ტერმინი “LPWAN” არაინტუიტიურად ჟღერს და რიცხვითი სიმბოლოს რაოდენობრივი მაჩვენებლიდან გამომდინარე პროგრესის ნაკლებობაზე მიუთითებს. თუმცა, სინამდვილეში, LPWAN კონცეფცია ფიჭური ქსელის ტრადიციული იერარქიის მიღმა მოქმედებს და მთავარ აქცენტს იმ მოწყობილობებთან დაკავშირებაზე აკეთებს, რომლებიც შორეულ ადგილებშია განთავსებული და შესაბამისად, სხვაგვარად ძნელადაა მისადგომი. Ზუსტად ასეთი მოწყობილობებისთვის უზრუნველყოფს კავშირს LPWAN ქსელები, მაშინ როდესაც ტრადიციული ქსელური კავშირი მოითხოვს დიდ რესურსებს და მაღალ ენერგოდანახარჯს მოწყობილობებისაგან (ნივთებისაგან).
არსებობს LPWAN ქსელის განმსაზღვრელი რამდენიმე ძირითადი მახასიათებელი:
გრძელი დიაპაზონი: LPWAN ქსელები ფართო ტერიტორიების დასაფარადაა შექმნილი, რაც შორეულ ადგილებში უწყვეტი კავშირის შესაძლებლობას იძლევა. ისინი დაბალი სიმძლავრის ფართო არეალის (LPWA) ტექნოლოგიებს იყენებენ და სხვა ფიჭურ ქსელებთან შედარებით გაფართოებულ დაფარვას გვთავაზობენ. აღნიშნული მახასიათებელი LPWAN ქსელებს სოფლის მეურნეობისთვის, ჭკვიანი მრიცხველების, ლოჯისტიკისა და გარემოს მონიტორინგისთვის იდეალურ გადაწყვეტილებად აქცევს.
ენერგოეფექტურობა: ბატარეის (კვების წყაროს) მუშაობის გახანგრძლივების მიზნით, LPWAN მოწყობილობები მინიმალურ ენერგიაზე სამუშაოდაა შექმნილი. ამ მოწყობილობებს ბატარეის ერთი დატენვით შეუძლიათ რამდენიმე წლის განმავლობაში მუშაობა, აქტივებისთვის თვალყურის დევნება, ჭკვიანი მრიცხველებისა და გარემოზე დაკვირვების სენსორების ხანგძლივი ფუნქციონირება.
ხარჯების ოპტიმიზაცია: LPWAN ქსელები დაკავშირების ეფექტურ გადაწყვეტილებებს უზრუნველყოფენ. LPWAN ქსელებისთვის საჭირო ინფრასტრუქტურა შედარებით მარტივად კონფიგურირებადი და დაბალბიუჯეტიანია, რაც მას განსაკუთრებით მიმზიდველს ხდის ისეთი ინდუსტრიებისა და ბიზნესებისთვის, რომლებიც კავშირის ხელმისაწვდომ ვარიანტებს ეძებენ.
LPWAN ქსელების ფუნქციური მრავალფეროვნება და უნიკალური მახასიათებლები შესაძლებლობას გვაძლევს რეალურ დროში თვალყური ვადევნოთ კონტეინერებს, მანქანებსა თუ ძვირფას აღჭურვილობას. LPWAN-ზე დაფუძნებული თვალთვალის მოწყობილობების ინტეგრაციით, ბიზნესს მიწოდების ჯაჭვის ოპერაციების გაუმჯობესება და დანაკარგების მნიშვნელოვნად შემცირება შეუძლია.
LPWAN ქსელებმა გარემოს მონიტორინგის პროცესი მეტად ხელმისაწვდომი და ეკონომიური გახადა. შორეულ ადგილებში ან ბუნებრივ რეზერვებში სენსორების განლაგება ხელს ისეთი ფაქტორების მონიტორინგს უწყობს, როგორიც არის წყლისა და ჰაერის ხარისხი, ნიადაგის ტენიანობა, ზვავები და ღვარცოფები, მეწყერი, ხანძრები ტყის მასივებში და ცოცხალი ორგანიზმების მიგრაციაა. აღნიშნული მონაცემები კომპლექსური პროცესების კვლევას და პოტენციური გარემოსდაცვითი საფრთხეების ადრეულ გამოვლენას უწყობს ხელს.
რაც შეეხება სოფლის მეურნეობასა და ჭკვიან აგრო-მრეწველობას, LPWAN ქსელები ფერმერებს მეურნეობასთან დაკავშირებული გონივრული გადაწყვეტილებებით უზრუნველყოფს. დაკავშირებულ სენსორებს რეალურ დროში შეუძლიათ დააკვირდნენ ნიადაგის მდგომარეობას, ამინდის პროგნოზსა და მოსავლის სიჯანსაღეს, რაც ოპტიმიზირებული მორწყვის, მავნებლების კონტროლისა და რესურსების განაწილებისთვის არსებითად მნიშვნელოვანია. LPWAN ქსელები მოსავლიანობის მაღალ ხარისხის, ხარჯების ოპტიმიზაციისა და მდგრადი სოფლის მეურნეობის პრაქტიკის დამკვიდრების წინაპირობაა.
სოფლის მეურნეობასთან ერთად, LPWAN ქსელები სამრეწველო პროცესების ავტომატიზაციასაც მნიშვნელოვნად უწყობენ ხელს. LPWAN ჩართული მოწყობილობებით, მწარმოებლებს შეუძლიათ აკონტროლონ აღჭურვილობის ფუნქციური მახასიათებლები, დაგეგმონ ტექნიკური მომსახურება და პროგნოზირებადი ანალიტიკისთვის შეაგროვონ მონაცემები. ეს, თავის მხრივ, ხარჯების ოპტიმიზაციას, შეფერხების დროის შემცირებასა და წარმოების პროცესის საერთო ეფექტურობას უზრუნველყოფს.
უნდა აღინიშნოს ისიც, რომ თანამედროვე სამყაროში, LPWAN ქსელები სულ უფრო აქტიურად გამოიყენება საჯარო ინფრასტრუქტურის (ხიდები, გზები და კომუნალური სისტემები) მონიტორინგისა და მართვისთვის. კრიტიკულ ინფრასტრუქტურაზე სენსორების განლაგებით, სახელმწიფოებს სტრუქტურულ სისტემებთან დაკავშირებული მონაცემების რეალურ დროში შეგროვება და გაანალიზება შეუძლიათ. ეს ყოველივე რესურსების განაწილების ეფექტურობას ზრდის, უზრუნველყოფს პროაქტიულობას და აუმჯობესებს უსაფრთხოების დონეს.
ტექნოლოგიური ევოლუციის უწყვეტი პროცესის პარალელურად LPWAN ქსელის შესაძლებლობები სწრაფი ტემპით ვითარდება, რაც, თავის მხრივ, “დაკავშირებული” (connected) სამყაროს სრულყოფისკენ გადადგმული მნიშვნელოვანი ნაბიჯია. ტრადიციული ფიჭური ქსელებისაგან განსხვავებით, LPWAN სრულიად ახალი შესაძლებლობების სამყაროს ქმნის ისეთი ინდუსტრიებისთვის, როგორიც სოფლის მეურნეობა, ლოგისტიკა, გარემოს მონიტორინგი და სამრეწველო ავტომატიზაციაა. ხარჯების ეფექტურობით, კონფიგურაციის სიმარტივით და ხელმისაწვდომობით, LPWAN-ს დიდი პოტენციალი აქვს, ისეთი რომ კავშირის (connectivity) რევოლუციის გზით, მთელი მსოფლიოს მასშტაბით შეცვალოს წარმოების პროცესი.
